Жаңалықтар

Болашақ педиатрлар жаңа Конституция нормаларын кәсіби жағдайларда қолдануда.
Болашақ педиатрлар жаңа Конституция нормаларын кәсіби жағдайларда қолдануда.
6 November 2026

Ағымдағы жылдың 4 қарашасында «Петр Поспелов атындағы Қарағанды медицина университеті» КЕАҚ-да Педиатрия мектебінің студенттеріне арналған, Қазақстан тарихы және ӘСП кафедрасының ПОҚ – Н.Ф. Ломан мен А.С. Моилбекованың ұйымдастыруымен «Қазақстан Республикасының Конституциясы парақтарымен» атты зияткерлік байқау өтті. Құттықтау сөзбен Академиялық және әлеуметтік жұмыс жөніндегі проректор, қазылар алқасының төрағасы Ж.А. Дәулетқалиева сөйледі.

Іс-шара 2026 жылғы 15 наурыздағы республикалық референдумда қабылданып, 2026 жылғы 1 шілдеде күшіне енген Қазақстан Республикасының Конституциясын зерделеуге арналды.

Байқауға Педиатрия мектебінің 1–3 курс студенттерінен құралған 9 команда қатысты. Командалар педиатр дәрігердің болашақ кәсіби қызметімен байланысты жағдаяттық кейстердің шешімдерін ұсынды.

Студенттерге күрделі құқықтық және әдептік жағдайларды талдау қажет болды: ата-анасы болмаған жағдайда балаға шұғыл көмек көрсету, заңды өкілдердің өмірлік маңызы бар емдеуден бас тартуы, кәмелетке толмаған пациенттің дербес және генетикалық деректерін қорғау, кемсітушілікке жол бермеу, тілдік құқықтарды сақтау, сондай-ақ балалардың өмірі мен денсаулығына қауіп төндіретін ақпаратты жасырғаны үшін жауапкершілік.

Әр команда өз кейсін алдын ала алып, таныстырылым форматын өз бетінше таңдады. Қатысушылар шешімдерін презентация, медициналық консилиум, сот талқылауы, әлеуметтік сауалнама, бейнеролик және театрландырылған қойылым түрінде көрсетті.

Шешімдерді дайындау барысында студенттер баланың қандай құқықтары қозғалғанын анықтап, Конституцияның тиісті баптарын тапты, мүдделер қақтығысының туындау себептерін түсіндірді және дәрігер мен медициналық ұйымның заңды іс-қимыл алгоритмін ұсынды.

Командалардың жұмысын сарапшылар тобынан құралған қазылар алқасы бағалады. Басты критерийлер – Конституция ережелерін дұрыс қолдану, шешімнің негізділігі, баланың құқықтары мен мүдделерін қорғау, педиатр қызметімен байланысы, командалық жұмыс және кейсті таныстыру сапасы болды.

Зияткерлік байқау Конституцияны мемлекеттің Негізгі Заңы ретінде ғана емес, сонымен қатар болашақ дәрігер үшін практикалық бағдар ретінде көрсетуге мүмкіндік берді. Педиатр клиникалық біліммен қатар, баланың өмірін, денсаулығын, қадір-қасиетін және дербес деректерін қорғаудың құқықтық негіздерін де түсінуі тиіс.

Байқау қорытындысы бойынша бірінші, екінші және үшінші орын алған командалар дипломдармен марапатталды. Қалған қатысушыларға сертификаттар табыс етілді.



143

Жаңалықтар лентасы

Жарияланды: 20.11.2026