«Зерттеулер мен инновациялар»
II Халықаралық биомедициналық форумы
22-23 қазан
ЖАЛПЫ АҚПАРАТ
Құрметті форум қатысушылары мен қонақтары!
Қарағанды медицина университетінің атынан сіздерді «Зерттеулер мен инновациялар» II Халықаралық биомедициналық форумында қарсы алуға қуаныштымыз!
Форум ғалымдарды, дәрігерлерді, оқытушыларды, жас зерттеушілерді, индустрия, мемлекеттік органдар мен халықаралық ұйымдардың өкілдерін біріктіреді. Оның басты мақсаты – ғылыми идеялар дамуға серпін алатын, жаңа технологиялар практикалық қолданыс табатын, ал университеттер, клиникалар мен бизнес арасындағы ынтымақтастық бірлескен жобалардың негізіне айналатын кәсіби диалог алаңын қалыптастыру.
Биыл форум тұжырымдамасында университетіміздің негізін қалаушы әрі тұңғыш ректоры, көрнекті дәрігер, денсаулық сақтау ісінің ұйымдастырушысы және медицина қызметкерлерінің бірнеше буынына ұстаз болған Петр Моисеевич Поспеловтың мұрасына ерекше орын беріледі.
Петр Моисеевичтің есімі Қарағанды мемлекеттік медицина институтының құрылуымен ғана емес, сонымен қатар оның негізгі құндылықтарының қалыптасуымен де тығыз байланысты. Олардың қатарында қоғам алдындағы жауапкершілік, медициналық білім берудің жоғары сапасы, ғылымға құрмет, жас мамандарды қолдау және адамдарға адал қызмет ету қағидаттары бар. Ол негізін қалаған дәстүрлер бүгінгі таңда да университетіміздің даму бағытын айқындап келеді.
Петр Моисеевич Поспеловтың мұрасына назар аудара отырып, біз тек тарих туралы ғана айтпаймыз. Біз ұрпақтар сабақтастығы, ғалым мен дәрігердің жеке жауапкершілігі, ауқымды мақсаттар қойып, адамдарға ондаған жылдар бойы қызмет ететін игіліктерді қалыптастыру қабілеті туралы сөз қозғаймыз. Дәл осы қағидаттар заманауи биомедициналық ғылымның негізінде жатыр және форум қатысушыларын біріктіреді.
Форумның ғылыми бағдарламасы төрт негізгі бағытты қамтиды:
- жаңа дәрілік заттарды әзірлеу және енгізу;
- OMICs-технологиялар – геномика, протеомика, метаболомика және басқа бағыттар;
- биоинформатика, деректерді талдау және биомедицинадағы жасанды интеллект;
- биоинженерия және медициналық технологиялар.
Форум аясында пленарлық және секциялық отырыстар, сараптамалық пікірталастар, шеберлік сабақтары, электрондық постерлік сессия, сондай-ақ заманауи медициналық, зертханалық және технологиялық шешімдер көрмесі өтеді.
Форум мазмұнды білім алмасуға, жаңа ғылыми идеялардың пайда болуына және ұзақмерзімді серіктестіктердің қалыптасуына мүмкіндік беретін алаң болады деп сенеміз. Тарихқа және алдыңғы буын өкілдерінің жетістіктеріне деген құрмет біз үшін берік тірекке, ал жаңа білімге, технологияларға және халықаралық ынтымақтастыққа ашықтық алға жылжудың негізіне айналсын.
Барлық қатысушыларға жемісті жұмыс, мазмұнды пікірталастар, жаңа кәсіби байланыстар және бірлескен бастамаларды табысты іске асыруды тілейміз.
